·
文、圖｜Vòng Hîn-lièn黃馨蓮／龍潭長老教會牧師
逐口陂塘摎水壩都有相連，通通透透、高高低低，將水引到需要个所在。
第一擺來到龍潭，感到真生趣，這位仰會安到「龍潭」？去尋資料，發現龍潭个名，係因為有「大陂塘」。
以前，這陂塘有野菱，陂塘个名安到「菱潭陂」。陂塘个南片有水泉，泉水窟有一垤白石，白石漏出來个時節，定著會落雨。沒水个時，潭水還做的保持一定个水量，假使恁久沒落雨，在大陂塘祈求落雨，定會落雨，鄉民認為當靈，喊佢作「靈潭陂」。
乜人意有想像力，認為陂塘肚有一尾黃色个大龍；有一年做天旱，歸莊仔人愁勞博激，求神託佛，乜無落半點雨。這時，有人講起：「深潭裡肚有一尾大龍，愛連食三日齋，用盡虔誠个心來祈求。」大家遽遽來食齋求雨，三日過後，黃龍對潭底飛起來，帶來大雨，強強愛荒忒个田地又做得蒔秧仔了，後來，這只大陂塘就安到「龍潭陂」。
逐擺坐飛行機，對天頂看下來，會看到桃園當多陂塘，敢怕有歸千只。陂塘係桃園个特色，有人講桃園係「千塘鄉鎮」，整個桃園地上，親像天頂个星仔，又像地泥面上个棋盤。陂塘對桃園農業个發展有當大个幫助，在沒有水庫以前，陂塘係農家人灌溉重要个來源。
兩百年前，客家个祖先來到這地方，大部分係土山，像就近个乳姑山，佇這位種植茶果樹，通過挖陂塘，變做灌溉農作物个水源，將珍貴个水留下來。逐口陂塘摎水壩都有相連，通通透透、高高低低，將水引到需要个所在。
另外，龍潭个土，大部分係紅土黃土，黃土較硬，水較毋會吸落去，故所做得挖陂塘，正不會煩惱漏水个問題，有利於蓄水蔭水。
當認識陂塘，就輒輒會去陂塘脣行路个時，就會讚美上帝賞賜客家人有智慧，做得在這土地做有智慧个事，祝福這塊土地。