讀經版本：Ruby版《聖經ê愛情、智慧文學 雅歌、箴言》，2014，台北：全民台語聖經協會
進 度：雅歌第一章、第二章、第三章
第一章第2節前小標題 少女；第8節前小標題 俊男。《現代中文》：新娘；新郎。《日文聖書》：おとめ（少女）；少男。阮認為若是頭前用「少女」後面用「少男」；若是後面用「俊男」頭前用｢美女」相對應，比較khah好。
第10節後半：你ê頷頸掛珍珠ê鍊á真好看。《巴克禮》譯文仝款。《和合本》：你的頸項因珠串而華麗。《現代中文》：像珠寶鍊子繞著脖子。《日文聖書》：玉飾りを掛けた首も愛らしい（掛佇頷頸的珠寶mā誠可愛。）“BBE”：your neck with chains of jewels.（掛佇頷頸的珠寶）大多數譯本無譯作「珍珠」(Pearl)。一般的記載，相信上早是佇古代印度西南部的一國Pandyas人，tī西元前五至六世紀的時，控制tio̍h當時佇南印度沿岸、印度kah錫蘭之間Mannar海灣，向採珍珠的漁民收購in佇海底採tio̍h的珍珠了後，加工製作出各種真súi的珍珠裝飾品。相當有文化水準kah gâu作生理的Pandyas人，生理作到現此時咱講的中東地區。若按呢講起來，西元前十世紀寫《雅歌》的時代，人類猶未發現tio̍h「珍珠」chit項寶貝，若準有，mā猶無普遍。所以chit句「珍珠」改作「珠寶」khah無問題。
第16節後半：咱ê眠床lóng是青綠色。《巴克禮》譯文仝款。《和合本》：我們以青草為床榻。《現代中文》：我們把青草當牀榻。《日文聖書》：わたしたちの寝床は緑の茂み（咱的眠床是綠色的草仔埔）。“BBE”：our bed is green.（草埔是咱的眠床）。阮認為譯作「青草埔作咱ê眠床。」可能khah好。
第二章第5節：用蘋果來勇壯我ê精神；《巴克禮》：「用蘋果來養我精神；」《和合本》：「給我蘋果，暢快我心，」《現代中文》：「用蘋果來恢復我的精神，」阮實在m̄知影「精神」beh按怎「勇壯」？其實用《巴克禮》版加一字“ê”tio̍h好，改作「用蘋果來養我ê精神；」
第8節：伊tiô tī山裡，跳tī嶺裡。《巴克禮》譯文仝款。《和合本》：他躥山越嶺而來。《現代中文》：他爬山越嶺向我奔來。《日文聖書》：山を越え、丘を跳んでやってきます（盤過山，佇嶺裡那跳那向我來）。其實咱會使用現成的一句話「盤山過嶺」講「盤山過嶺那跳那向我來」tio̍h真清楚明瞭。
第12節尾句：tī咱ê境內聽tio̍h鳩鵻（ka-chui）ê聲。《巴克禮》譯仝款。《和合本》：斑鳩的聲音在我們境內也聽見了。《現代中文》：在田野間已可聽到斑鳩的聲音。照《普通話閩南方言詞典》華語「斑鳩」，閩南方言漢字寫作「鵁佳」拚音作“gāzūi”，按呢咱tio̍h知影，今仔日的廈門人猶原kā「斑鳩」叫作“ka-chui”，但是講“ka-chui”可能大部分的台灣人聽無，咱台灣人有現成的名thang叫那會無愛叫？一般咱台灣人攏叫作「斑鴿」（pan-kah），
第三章第2節：Taⁿ我beh起來，tī城內四界行，tī街路，tī寛闊ê所在，我beh chhōe
我心所愛ê。第四句「tī寛闊ê所在」的「寛闊」那像是華語、m̄是台語。台語咱khah慣勢講「開闊」、「曠闊」。