文、圖|陳致綸/臺北南門基督長老教會青年,國立臺灣師範大學臺語文學系碩士生
閣阮嘛清楚知影,來到遮,是為著予阮通向所追求的標,閣進前一步。
我的鎖匙圈仔
彼工下晡的雨,共我的鎖匙圈仔淋 kah 澹漉漉,毋過嘛拄仔好通共洗洗咧。這个鎖匙圈仔是 2019、2020 年彼時,臺中大專中心佇畢業禮拜送予畢業生的紀念品,毋知猶有偌濟人咧掛?我是自提著就掛到今,這馬已經無蓋清氣矣。
前一站仔湊坎咧寫關係家己性命的見證,彼陣寫著讀大學的彼四冬,干焦用幾句仔話。我講,彼四冬大大開闊我的眼界,予我佇面對挑戰抑是艱難的時,通徛在袂逃閃;毋過其實彼四冬,全然毋但按呢。拄仔好最近大專界有出真大的風波,我想這顛倒是一个回顧家己的性命,甚至是檢討一寡體制的機會。無,就來講看覓,我大學彼四冬,佇大專的經驗好矣。
佇大專長青團契
其實轉來臺北了後,大專 oân-á 是有咧參加,只是無法度像彼陣佇臺中遐爾投入,毋過我猶是會期待逐擺長青團契的聚會。佇遐,逐人會當真自在分享家己對聖經、對議題的觀察抑是見解,每一个 tiàm 遐的人攏是按呢,照家己性命的經驗,去讀、去感受,然後分享,閣來對話,激出新的觀念 kap 想法。這是一个有機的群體,無論規模是大抑細。
![臺中大專靜宜弘光長青團契。 臺中大專靜宜弘光長青團契。](http://custom-images.strikinglycdn.com/res/hrscywv4p/image/upload/c_limit,fl_lossy,h_9000,w_1200,f_auto,q_auto/1654895/781894_901312.jpeg)
若是這陣 tiàm 大專服事的牧者,努力予所有佇咧這个群體的羊群通受尊重,佇分享的時陣 bē 受阻擋,bē 去煩惱家己所講的有正確--無、有問題--無?因為所有來到遮的人,心頭攏是有寡疑問想欲 tháu--的;閣阮嘛清楚知影,來到遮,是為著予阮通向所追求的標,閣進前一步。
這个旅途,欲算數明明是真,甚至是無法度。毋過路尾——當畢業,欲四散彼霎,阮攏會得著比佇起頭所揣求的閣較豐盛的恩典離開,轉去到家己的家鄉,抑是去到新的所在,面對新的挑戰。
「阮聚集,是為著四散。」
就若像我轉去南門,以及濟濟四散到各地的長青人。