·
文｜劉菊英／龍潭長老教會長老
圖︱王美書
在恁寒又恁暗个時節有人來？門正打啊開，就看著冬雪阿姨手項扐等一包東西。
寒天个北風
寒天个北風就像潑婦樣仔，雞嫲杈擎起來亂亂杈，刺骨个冷風像利利个刀仔，咻咻滾削等過，早早就將日頭逐轉屋下去了！
日頭轉屋去，無一下仔就暗摸胥疏了。這個潑婦北風毋單將日頭逐走，連燈盞火佢都愛欺負喔！𠊎正點啊著个佢又摎𠊎歕烏忒去，滿哪暗摸叮咚又冷到會高毛。大人細仔早早就囥到被骨竇，𠊎遽遽將功課寫好，尖到姐婆脣个被骨鑽落去。燒燒个人氣衝等，暖暖个被骨弇等，無一下功夫𠊎就睡忒去了！
冬雪阿姨个愛心
好恬恬聽搉門聲，續等聽著「阿隆伯、阿隆伯」氣急急仔个喊門聲。姐公遽遽跋䟘床去看發生麼个事情，仰會在恁寒又恁暗个時節有人來？門正打啊開，就看著冬雪阿姨手項扐等一包東西，姐公開嘴正愛問，冬雪阿姨就講：「阿隆伯，這條乳豬分豬嫲矺著，可能畜毋生了！毋過還燒燒，你愛無？」
姐公心肝歡喜，遽遽應講愛，就將乳豬仔接過來，連連承蒙冬雪阿姨个恩情。在𠊎這個缺少食糧个家庭肚，這條乳豬仔，就像天旱時个及時雨，分全家人加添營養分；冬雪阿姨个愛心像珍珠瑪瑙，雖然細細嗄十分貴重打眼。
因為該央時，不管係大豬、細豬也係死豬，都做毋得自家㓾，故所姐公將燈盞火放低低的，就驚會分人看著。透夜喊阿姨䟘起來暖水𢯭手㓾乳豬，細心細義將乳豬仔㓾好，打料、滷鹽留等來傍飯。
逐擺若想著該一暗晡，就盡感謝冬雪阿姨个愛心，分𠊎一家人在刺骨个寒天肚感受大大个溫暖。