文、圖｜謝明翰／台南大專南台百合團契 107 級畢契，鹽行基督長老教會青年
忽然間 Ngaiˇ 有一個想法閃過去，Ngaiˇ 想到《聖詩》（2009）裡肚有用客話吟唱个， Ngaiˇ 應該做得帶大家唱吧！
大概八、九月份个時節，教會長老問 Ngaiˇ ：「下一季愛做會前敬拜个服事無？」記得 Ngaiˇ 該央時黏時就答應佢了。毋過， Ngaiˇ 心肝肚其實係毋想个，因為 Ngaiˇ 在這間教會恁久了，從來毋識做過這種服事，心肝肚有兜仔驚驚。
過了一駁仔，教會長老走來問 Ngaiˇ 講：下禮拜係佢會前敬拜，將就換 Ngaiˇ ，莫等下一季了。 Ngaiˇ 心肝肚想，壞了！佢就恁樣問 Ngaiˇ 了， Ngaiˇ 愛仰仔拒絕佢， Ngaiˇ 高不將就講好啦。
在準備會前敬拜个這禮拜， Ngaiˇ 緊想講愛帶領弟兄姐妹唱麼个歌？當然用一般教會个習慣，會前敬拜有包括練習當日做禮拜愛唱个歌， Ngaiˇ 緊想恁樣太簡單了，無麼个特別。忽然間 Ngaiˇ 有一個想法閃過去， Ngaiˇ 想到《聖詩》（2009）裡肚有用客話吟唱个， Ngaiˇ 應該做得帶大家唱吧！有了這個想法以後， Ngaiˇ 就試著毋驚了，心肚緊想 Ngaiˇ 一定愛帶大家會前敬拜。因為這係在福佬庄絕對毋會有个內容：一方面做得分這兜福佬人知𫣆个聖詩毋係單淨係用福佬話唱，用客話乜做得唱；另外一方面乜分 Ngaiˇ 有機會將客家帶分毋係客家人來熟識。客家對苗栗、新竹這兜地方可能毋麼个稀奇，毋過對台南這個福佬人口占了 93% 个地方，就非常稀奇。
到尾， Ngaiˇ 決定用《聖詩》（2009）第 404 首〈日頭出來好天時〉來帶大家唱，為了無愛嚇到大家， Ngaiˇ 帶大家唱第一節定定。禮拜結束以後，有兜弟兄姊妹同 Ngaiˇ 講： Ngaiˇ 帶个會前敬拜正經當特別，佢完全無唱過客話个聖詩。這就分 Ngaiˇ 想到〈台灣基督長老教會信仰告白〉裡肚講个：「教會係上帝子民个團契，……認同所有个住民……。」盼望 Enˊ都做得疼惜身邊無共樣族群个人，在佢兜需要𢯭手个時節幫忙佢兜，大家認同各人美好个身分。
