前期提要
1933年5月（《教會報》578卷）對這期開始，《教會報》將四個醫生館ê廣告kā刊做伙，連續8個月久。這四間病院是：嘉義十全醫院、台南青峰醫院、燕巢瑞安醫院、大甲德仁醫院。這四間病院ê家族故事，會使對台灣早期教會史講到今仔日。 嘉義十全醫院、台南青峰醫院ê故事刊載前期，下面筆者繼續紹介高雄的瑞安醫院、德仁醫院ê院長以及in ê後代對教會、社會ê影響。
瑞安醫院
周瑞是台灣醫療傳道史中ê奇才。伊1889年10月19出世。佇高雄ê三塊厝（佇今仔日ê三民區出世）。老父早死，老母擱嫁，後叔姓周，伊就tòe後叔ê姓。
1902年，周瑞13歲，對鳳山公學校畢業。有一擺chhōa伊ê老母去新樓病院看目睭。Tú著馬雅各二世。馬雅各醫生感覺這個囝仔會栽培--得，就請教士會幫贊周瑞去長老教中學註冊讀冊。長中最後一年（第四年），iáu未開學，馬雅各二世tō派人去kā周瑞辦退學，去新樓病院學醫學。就按呢，周瑞踏出醫療傳道ê第一步。
1911年，2月26，周瑞修了「師徒制」ê醫學課程。馬雅各二世、安彼得醫生、蘭大衛醫生做伙tǹg印仔予伊一張畢業證書。頂面寫：「（周萬邦即周瑞），右者自明治三十九年六月迄今計四年半。在打狗及台南英國長老教醫院，從學於馬雅各、安彼得、蘭大衛。所學者即內科藥物學、外科解剖學、婦人產科學、細菌學、病理學各科。俱見通曉，且其力克勤、其德可嘉。今屆卒業之期，應將卒業證書給與。明治四十四年二月二十六日。」（標點符號是筆者加--ê）後面有馬雅各、安彼得、蘭大衛醫生ê名kap印仔。
周瑞佇日本時代做限地醫，醫療傳道ê路行了真辛苦，嘛予人感覺真感心。伊佇中洲、燕巢、三塊厝等所在做醫生，甘心奉獻。伊奉獻ê禮拜堂有旗後禮拜堂、關仔嶺禮拜堂。最後mā kap 人同心起造高雄三民教會ê禮拜堂。1933年5--月，許水露牧師tō佇《教會報》記伊奉獻旗後禮拜堂ê代誌：「熱心疼主ê兄弟周瑞先生，欲獻兩千箍（Y2000.00）對教士會買收現時teh聚集ê樓kap土地做旗後禮拜堂ê路用……實在真感心。早有疼主ê兄姊，現時亦有。」
我讀周瑞ê資料，看伊後--來奉獻、參與佇高雄三民教會ê開拓事工，真感動。伊無意中完成一項歷史使命。1866年，老馬雅各醫生bat佇三塊厝設佈道所，「差不多彼時，亦有去三塊厝sòe一間厝佇街--ni̍h，禮拜日kap平常ê日有開門講道理予人聽。講差不多chiâⁿ年久，無啥物功效，chiah擱收--起-來。」（黃嘉智〈教會ê來歷〉《教會報》，1899年2月）1951年3--月，鹽埕教會佇三塊厝設支會，周瑞原本是鹽埕教會ê長老，教會欲佇伊ê故鄉設教會，伊就轉來三塊厝kap賴巷、洪以利、蔡文學等人，共同起造上帝ê聖會，這間教會就是今仔日ê高雄三民教會（註1）。對1866年設教，無成功。擱khiā--起-來ê時，已經是1951年矣。周瑞參與這項歷史工程，予我讀kah足感動。
德仁醫院
德仁醫院ê院長是彭清靠長老。照刊--出-來ê廣告文看，彼時彭長老佇大甲開業。這項代誌愛對彭長老青年ê時去台北讀冊，佇雙連教會禮拜講起。
彭清靠長老是彭士藏傳道ê三男，1907年進入台北醫學校，1912年畢業。The̍h著醫師資格佇台北馬偕病院服務，是台北馬偕病院ê第一批醫生。亦因為佇馬偕做醫生，伊就近佇雙連教會禮拜。佇雙連，伊認識雙連陳溪圳牧師ê小妹陳全嬰小姐。二人1915年佇大甲結婚，證婚人是張金波牧師。
1914年，彭長老佇大甲開業，這間病院tō是這擺討論ê德仁病院。彭長老後--來有擱去東京繼續進修。1935年轉來台灣，換去高雄開設「彭產婦人科病院」。《教會報》ê廣告有反應這間診所ê變遷史。1935年6--月ê《教會報》tō有佇「高雄崛江町」ê「彭產婦人科病院」ê廣告。（彭長老去高雄開業有影響著彭明敏，彭明敏因為老父sóa去高雄，所以伊讀過高雄中學。）
彭清靠長老有兩項代誌予我印象真深。頭一項，1945年2月27，高雄予美軍ê飛機炸kah哀爸叫niû-lé。彭產婦人科mā歸間攏燒kah『全部歸於烏有』。彭清靠長老佇這時講：『財產是耶和華賞賜，耶和華收回。沒有一點點不平，也不會捨不得。感謝耶和華，感謝給我們使用到今天。』（註2）
第二項，佇228事件ê時，彭長老擔任228處理委員會高雄市ê主委。受高雄市民之託，去高雄要塞chhōe彭孟緝參詳。欲拜託--伊，m̄通予伊ê巡邏隊四界匪類，看著人聚集tō開槍掃射。結果這寡代表一入司令部，tō予人綁--起-來。Soh-á對手牽到ām-kún。兵仔用刺刀指in ê胸坎，kā in heⁿh-kiaⁿ。涂光明佇彼陣大聲罵蔣介石，結果予人凌遲，最後槍殺。彭清靠好運無死，轉--來了後，兩工無食物件。這項代誌對伊打擊有夠深，予伊講：「為身上的華人血統感到可恥，希望子孫與外國人通婚，直到後代再也不能宣稱自己是華人。」（註3）
彭清靠有一女三男。長女彭淑媛，醫生，醫學博士，bat做過淡專ê校長。大子彭明哲bat佇日本長崎做過醫生，後--來轉來高雄開婦產科。二子彭明輝，做生理，佇台北和平教會做長老，盡心服侍上帝。三子彭明敏，前台大教授，前衛出版社出版ê《自由ê滋味》是伊ê故事。我bat佇中山醫學大學教「大一國文」，用這本冊ê部分資料做教材，讀ê人印象攏真深。
這四份廣告刊做伙，無打算mā將台灣醫生ê養成史表現--出-來。周瑞是早期師徒制教--出-來ê醫生。林朝乾、彭清靠是德日制培養--出-來ê醫生，中學後讀醫科。劉清風是英美制，學士後醫學系培養--出-來ê醫生。這份廣告將四人排做伙，是m̄是預告今仔日ê「混合制」（有德日制，mā有英美制）？
註：
- 請參考編輯委員會《限地醫生──周瑞醫師傳記》（台南：台灣教會公報社，2008）頁61。賴永祥長老mā bat 提起三塊厝1866年設教ê事。賴永祥《教會史話》（第二期）（台南：台灣教會公報社，1992）頁41。賴長老ê文章題目是〈三塊厝・莊清風〉。
- 彭明輝，《彭清靠小傳》（台北：新使者雜誌，1995年10月）頁25-28。
- 彭明敏，《自由的滋味》（台北：前衛出版社，1988）頁80。