作者︱陳清俊 (北投基督長老教會洗禮、休士頓台灣教會長老、波士頓台灣教會長老。)
北投教會原本是tùi原住民開始ê教會，早期由馬偕所設立--ê，是一間有西洋方式ê教堂。1950、60年代ê北投教會，tō是我生長ê時期；全名是北投台灣基督長老教會(簡稱北投教會)，有真特別ê特色。五个長老中有李德財 kah李陳仁愛夫婦，南部來ê林劉瑞蘭，原住民林義德， koh有「外省人」王述先。
頭一个特色是雙語禮拜。Tī二次大戰後，日本政府離開台灣，國民政府來台灣。國民黨中央黨部先設tī 北投，用溫泉博物館(原本是日本軍人招待所，受改名做中山堂)，做黨部會所。因為北投有真chē日本人留落來ê厝宅，kah真chē公家機構，所以，有真chē 「外省人」(tùi中國來ê政府有關人員)tō tòa tī北投。其中有真虔誠ê基督徒，in就自然來到北投教會。Hit時，大戰後第一任牧師林再添為tio̍h方便各方面ê信徒，就開始雙語 ê禮拜。阮tau tī 1950年四月tùi士林徙到北投，tō加入北投教會。
Hit時，我是小學二年，教會tō有郭顯明執事擔任翻譯ê工作。就我所知，ta̍k禮拜ê講道是雙語翻譯。(台語翻華語) ，chit-ê翻譯一直到我出國(1967年) lóng繼續無停。Tī教會ê長老中間有chi̍t-ê 「外省人」王述先長老，mā一直做北投教會ê長老。我也會記得有朱家語等等ê人參加。到我khah大漢，除了王述先以外，iáu有夏劍塵、雷貽棠先生媽，tō是黃長老(雷黃溫柔) (tùi福建去菲律賓，chiah來到北投)全家，chit-kóa 「外省人」經常來參加禮拜。有時王述先也上講台證道，是華語翻做台語。有時，週間ê家庭禮拜mā用雙語。有一个「外省人」錢公來，伊是政府ê顧問，平常時罕得來禮拜，總是ta̍k年聖誕節ê報佳音lóng會去in tau。
第二个特色是發行刊物。 Tī現在，教會發行刊物是真平常ê tāi-chì，總是tī 1950、60年代，教會若有週報已經是真進步--ah，mài講有額外ê刊物。主要ê 刊物是ta̍k年ê年尾報告(新春感恩禮拜ê時發ê報告)。因為有雙語禮拜，koh訓練真chē翻譯人才。Koh chē少有「外省人」ê互相交流，所以tùi中文bē生（chheⁿ）份。其中有一个人我ài提起
--ê tō是何永興，伊tī教會刊物 ê發行有大ê貢獻。教會tī 1968年四月到1972年四月，有排版印刷正式發行，刊物叫做「佳美」，四年久共行二十五期。Hit時ê年尾報告mā chiah是油印，用油紙膽寫版一字一字寫(刻)--出來，ài真大ê工夫。我本身並無參與「佳美」ê事工。
話講到何永興，伊是阮ê厝邊，mā是我小學siâng班ê同學。阮做伙上課，做伙去兒童主日學。伊tī 細漢tō真想ài做新聞記者；伊ê老父tī北投旅館公會kah記者公會ê所在排擔á，賣薰等等ê小seng-lí；伊真細漢tō知記者chit-ê行業。伊小學tō真認真學中文，認真學習，也請（chhéng）教大人真chē tāi-chì。In tau有美術ê天份，gâu畫圖。Tùi圖畫會曉欣賞。Tī小學，伊tō teh講梵谷(Van Gogh)ê tāi-chì。Tī 初中ê時，阮兩人同時洗禮，加入北投教會，tō有辦刊物 ê計畫。Siōng tāi-seng，有用油印ê 刊物，叫做教會周刊(m̄是教會週報)，是用報紙ê方式來編排、來寫。內容有消息，有文章刊登，亦有教會歷史kah人物訪問。雖然是油印，一字一字刻，伊寫文章，採訪教會各種人物，koh編輯、排版了後chiah來刻，印出，真了工。我常常做伊ê副手，tàu寫tàu印。後--來我ê小弟mā參與chit-ê工作。教會ê油印機kiám-chhái是因為阮用真chē，有時連紙mā阮出錢來買。Án-ne做，每拜六油印出刊有十gōa年久。
我mā有參與教會聖歌隊歌譜ê刻kah印，後來因為做兵有停一chūn。到我出國ê時，何永興亦做兵tńg--來，koh有世界新聞專科學校 ê訓練，伊tō計畫排版印刷 ê 刊物發行。Tī 1968年發行「佳美」ê 雙月刊，是由青年團契(TKC)所發行。內容用團契ê活動做主，亦有教會各項消息。其中有林牧師tī馬偕病院手術失敗ê報告等等，chit-ê刊物繼續有四年久。因為一个刊物需要真chē人參與，互相合作學習、鼓勵。團契有活氣，有目標，真chē人lóng成做真好ê同工。到五十年後ê今á日，團契iáu有互相連絡，也kā以前「佳美」 刊物 koh再上網，是一个真好ê團隊。感謝上帝hō͘ 阮有機會得tio̍h一个美好ê少年時間，hō͘阮有一个真好ê見證。