作者︱林俊育 (全民台語聖經協會秘書長、台語信望愛網站主編)
踏話頭
2001年，李勤岸教授來哈佛大學教台語，伊mā來波士頓台灣基督教會成人主日學教阮台語，hō͘ 我tam-tio̍h咱母語ê滋味hiah-ni̍h-á好，我就án-ne潦落去參與台語文運動。
台語文同工tú-tio̍h我to̍h問：「世界各種語言ê聖經lóng有上網，ná會獨獨無看tio̍h台語聖經？」
我kā陳清俊長老用去6年半時間phah好ê《巴克禮白話字聖經》整理好勢，請台灣聖經公會上網，in卻拖到尾á soah無beh上網；台語文界ê人建議kā白話字ê《紅皮聖經》上網，陳清俊長老mā趕緊kā它phah字，來由陳鄭弘堯先生tī「暗光鳥ê厝」上網。
Hit時，專攻各種版本聖經上網ê「信望愛網站」，in tùi「暗光鳥ê厝」網站chhōe-tio̍h《紅皮聖經》，就e-mail來請我hō͘ in電子檔案thang上網起lih「信望愛網站」。我hō͘ in《紅皮聖經》ê電子檔案，借chit-ê機會請in來起造「台語信望愛」網站，in一聲to̍h答應。了後koh起造「客語信望愛」、「思羅安」（台語點字）kah《全民台語聖經》網站，利益chē-chē人。
我lóng利用回台ê期間去台南，tī信望愛技術組負責人蔡哲民教授下班ê暗時，阮並肩作戰；除了架設以上四个網站以外，伊koh開發台語kah客語ê「全羅轉漢羅」、「漢羅轉全羅」、「華語轉台/客語」、「漢羅Ruby版」kah書寫台語點字ê工具，提升我ê網路作業效率。
台語信望愛網站
信望愛全球資訊網是由1990年代「交通大學校園團契研究生小組」發起。In感覺未來是網路資訊ê時代，所以，in先借用校園團契輔導ê電腦來架設，後來就家己chhōe幾个同工做伙寫程式，phah工去買一台電腦，開始架設信望愛網站。
我一直感覺網路時代tio̍h架設網站來傳福音，蔡哲民教授答應架設「台語信望愛」網站，ē-sái講是我一生siōng歡喜ê tāi-chì，感謝主！O-ló主！
Hit當時，我koh有真chē台語文資訊，像講我翻譯2年半完成ê《台日大辭典》（1933年由台灣總督府出版，beh hō͘日本來台ê官員學台語；我ê台語老師李勤岸教授講he是siōng好ê台語辭典，用片假名注台語音，koh是日文解說），台語文界lóng ǹg望ē-tàng緊上網thang用。
我就kā網站ê內容設定做用「推廣台語」來引chhōa讀者漸漸接近基督教，文字專欄有基督教信仰kah台語文研究參雜做伙，當然是lóng用台語文書寫，大部分lóng是漢羅lām寫。《巴克禮白話字聖經》kah《紅皮聖經》lóng有白話字版kah漢羅版，而且有聖經台語朗讀。
Hit當時，教育部有根據教會羅馬字（一般稱做白話字）約修改10%，成做「台羅拼音方案」ê羅馬字系統。台語信望愛網站設計兩个入口：教會羅馬字kah教育部台羅傳統版。Chìn前bat有教會ê青年執事講伊學教育部ê「台羅」，問我台語信望愛kám有台羅版ê網路聖經，伊需要司會讀台語聖經；我報伊tio̍h選伊beh ài ê入門，伊歡喜kah bē講得，一直kā我說多謝。
網站koh有提供真chē台語教材，「台灣長老教會白話字基本教材」to̍h是其中之一。有一kóa青年靠chiah-ê台語教材學會曉白話字，mā寫真好用ê手機台語輸入法：iPhone kah iPad ê “lohaka” kah Android ê “Phah Taigi”，hō͘ 我真受感動。
客語信望愛網站
台語信望愛網站有ê，客語信望愛網站mā lóng有。Hit當時，我請曾昌發牧師來tàu腳手，m̄-koh伊答應好了後，to̍h走去讀博士；我只好請邱善雄牧師來tàu腳手，伊答應好了後，因為目chiu開刀，soah無法度使用電腦；伊就請伊tī中山醫學大學台語系客語組ê劉敏貞kah涂瑞儀兩位客家人（Hak-kâ-ngìn）來tàu腳手。劉敏貞因為處理客語聖經有受感動，就án-ne受洗。
這是台語點字ê網站。我tī 1989年擔任雙連教會服務委員會主委ê時，開拓盲人事工，chit-má每禮拜有二十幾位盲朋友來禮拜。教會一開始to̍h有盲人幹事吳月雲teh製作點字ê週報，hit當時有人報讀。吳月雲tio̍h癌過身了後，由許梅芳擔任盲人幹事，soah無人替她報讀，她只好tùi網路掠華語聖經。有一工，一位盲朋友kā我講：「林長老，台頂teh讀台語聖經，我卻teh摸週報ê華語聖經，真艱苦。」
我iáu會記得「疼to̍h是tī別人ê需要上看tio̍h家己ê責任」，所以，我用一年ê時間kah會曉台語點字ê盲朋友共同努力，幾nā暝kah蔡哲民教授並肩作戰，完成思羅安（Sloan，約翰福音第九章）信望愛網站：有點字加有聲ê《巴克禮聖經》kah《紅皮聖經》，《全民台語聖經》完成了後mā隨時上網，hō͘ 盲朋友tī厝裡mā ē-tàng摸點字讀聖經；koh有台語聖詩點字歌詞加Midi伴奏，hō͘ in mā ē-tàng tī厝裡唱聖詩。
全民台語聖經網站
全民台語聖經協會出版「台灣長老教會設教150週年記念版」ê《全民台語聖經》了後，有架設以台語聖經為主ê網站：http://ctb.fhl.net，kā全民台語聖經khǹg tī頭前，有全羅版、漢羅版、漢羅Ruby版kah其它信望愛聖經版本。以外，koh有靈修資源（目前有《聖經解釋學導論》kah《Kui年kah Jimmy Carter做伙靈修》）kah輔助工具。
結尾ê話
我沿路做chit-ê網路福音事工，沿路招人來加入chit-ê團隊，koh有蔡哲民教授ê網路技術支援，hō͘ 福音ē-tàng傳到天邊海角，jú做jú有成就感。願上帝記念每一个人所做ê工，加添賜福！