·
作者︱王貞文(故台灣基督長老教會牧師)
因為有深深的疼
所以受沉重的傷
台灣是你人生第一擺的愛情
你熱火火的青春燒甲旺旺
彼時你看著伊脫出百年來壓迫的鐵鍊
褪落phú-phú爛爛的藍布舊衫
換一軀（su）翠青的短裙
踏懸踏仔鞋koh-koh-koh
搖來搖去行佇新鋪的民主路
青春燦爛的 笑容
有庄跤姑娘的純真
伊的名是盼望是尊嚴
你kap千千萬萬的人做伙競爭這位姑娘的心
無想欲占領 無欲求權力
只有偷偷仔問家己
伊敢會記得
彼位為著伊的解放拚命
通暝寫作發批的少年人？
翠青純真的姑娘仔行佇民主路
Koh-koh-koh伊的跤步變妖嬌
伊學會曉咬一蕊含笑花
Kap有錢有勢的愛人仔跳舞
雖然in越頭就栽入對岸厲害老阿婆的懷抱
五千年金粉味加飛彈銃子的優勢
尖尖的手指甲佇琵琶頂彈出戰歌
總是你只有看著彼蕊含笑
看著伊凌亂的跤步 卑微可憐的笑
戇台灣！戇台灣！
你的心滴血
你的腦昏亂
你講你是hō͘台灣刺傷的少年人
佇你的至愛閣一擺面對鎖鏈的時
你講你毋知著按怎來行
2004/3/10